Cyflwyniad
Diben ymgynghorydd iechyd a diogelwch (a elwir yn hyfforddwr
iechyd a diogelwch neu'n archwiliwr iechyd a diogelwch, weithiau)
yw cynghori adrannau awdurdod lleol a gofalu eu bod yn gweithio'n
ddiogel yn ôl gofynion y gyfraith ym maes iechyd a diogelwch.
Mae'n gyfrifol am fonitro ac archwilio cydymffurfiaeth â'r gyfraith
a pholisïau'r cyngor, a lledaenu'r arferion gorau trwy wella'n
barhaus.
Amgylchiadau'r gwaith
Swyddfeydd yr awdurdod lleol yw canolfan ymgynghorydd iechyd a
diogelwch, fel arfer - naill ai ymhlith tîm o ymgynghorwyr neu ar
ei ben ei hun. Weithiau, bydd swyddog iechyd yr amgylchedd yn
gweithredu'n ymgynghorydd iechyd a diogelwch i'r awdurdod.
Bydd ymgynghorydd iechyd a diogelwch yn treulio llawer o'i amser yn
archwilio ac yn hyfforddi staff holl adrannau'r awdurdod gan eu
cynghori, eu helpu i ddatrys problemau, eu dysgu a'u
cynrychioli. Felly, rhaid ymweld â swyddfeydd yr amryw
adrannau.
Gweithgareddau beunyddiol
Mae'r gwaith yn amrywio'n fawr, a gallai fod angen gwneud unrhyw
o'r canlynol:
- cynghori rheolwyr (fel y bo'n briodol) am holl agweddau iechyd
a diogelwch megis deddfau perthnasol, cyfarwyddebau, codau ymarfer
a pholisïau;
- helpu i lunio a diweddaru canllawiau, polisïau, arferion a
gweithdrefnau gan ofalu eu bod yn cyd-fynd ag unrhyw ofynion
penodol;
- asesu peryglon a materion eraill (megis gweithdrefnau rheoli
cemegion) a chynghori am y camau priodol pan fo angen;
- archwilio safleoedd i ofalu eu bod yn cydymffurfio â deddfau
perthnasol a pholisïau/gweithdrefnau'r awdurdod lleol, gan argymell
camau cywiro;
- ymchwilio i ddamweiniau, digwyddiadau a cheisiadau ynglŷn ag
eiddo'r awdurdod lleol;
- hyfforddi gweithwyr newydd ym maes iechyd a diogelwch;
- gwerthuso, llunio, datblygu a chynnal cyrsiau hyfforddi
priodol;
- cysylltu (fel y bo'n briodol) â chontractwyr, clientiaid a
chyrff allanol megis yr Awdurdod Gweithredol dros Iechyd a
Diogelwch;
- cadw cofnodion papur ac electronig am iechyd a diogelwch, gan
gynnwys ystadegau am ddamweiniau.
Medrau a diddordebau
Rhaid i ymgynghorydd iechyd a diogelwch asesu pobl, gweithleoedd a
gweithdrefnau yn ogystal â hyfforddi staff. Felly, mae medrau
trin a thrafod pobl yn hanfodol. Mae medrau ysgrifennu'n
hanfodol hefyd, gan fod angen llunio adroddiadau a llythyrau yn
ogystal â gweithdrefnau pob adran. Dylech chi allu dehongli'r
gyfraith o ran iechyd a diogelwch fel y bydd modd ateb y
gofynion. Mae angen ymroddiad a diddordeb ym maes iechyd a
diogelwch er mwyn cadw golwg ar ddatblygiadau newydd.
Meini prawf derbyn
Dyma'r amryw lwybrau:
Llwybr 1: Tystysgrif Bwrdd Cenedlaethol Archwilio Iechyd a
Diogelwch Galwedigaethol (NEBOSH). Bydd Diploma 1 a 2 NEBOSH
ynghyd â phrofiad perthnasol yn arwain at aelodaeth gyflawn o
Sefydliad Diogelwch ac Iechyd Galwedigaethol (IOSH).
Llwybr 2: Asesu yn y gwaith ar gyfer Cymhwyster Galwedigaethol
Cenedlaethol ym maes arferion iechyd a diogelwch galwedigaethol
(rhwng lefel 1 a lefel 4). Ar ôl cyrraedd lefel 4, cewch chi
fod yn aelod cyflawn o IOSH.
Llwybr 3 - Gradd prifysgol ym maes iechyd a diogelwch
galwedigaethol.
Gobeithion a chyfleoedd yn y dyfodol
Mae cyfle i gael dyrchafiad, er bod rhagor o gyfleoedd yn yr
awdurdodau mwyaf. Yn aml, rhaid mynd i awdurdod arall i gael
profiad, gwybodaeth ehangach a dyrchafiad.
Rhagor o wybodaeth a gwasanaethau
Cyngor Diogelwch Prydain: www.britsafe.org
Sefydliad Diogelwch ac Iechyd Galwedigaethol: www.iosh.co.uk
Cymdeithas Frenhinol Atal Damweiniau: www.rospa.com
Cyfeirlyfr Sefydliadau Iechyd a Diogelwch Proffesiynol y DG: www.safetydirectory.com
Cewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.