Cyflwyniad
Nid oes raid i chi fod wrth eich bodd â charthffosiaeth i weithio
yn uned rheoli llygredd y gwasanaethau amgylcheddol. Ond, fel
swyddogion technegol eraill yn yr uned, gallech fod yn treulio
tipyn o'ch amser yn delio â chwynion am amrywiaeth o broblemau sy'n
poeni'r gymuned leol. Byddai llawer o'r rhain yn golygu ymosodiad
ar y synhwyrau i gyd i ryw raddau - sŵn, arogleuon, llwch, cŵn yn
cyfarth neu gynigion cynllunio newydd.
Ond rhan o'r ateb yw rheoli llygredd, nid y broblem. Gwaith
positif yw gwaith y swyddog technegol. Maent yn ysbrydoli ac arwain
pobl i wella'r amgylchedd ar ran pawb. Mae swyddogion technegol yn
adran iechyd yr amgylchedd yn sicrhau fod ble mae pobl yn byw ac yn
gweithio yn lân a diogel, a gallant gael llawer o foddhad o ddatrys
problemau pobl.
Yr Amgylchedd Gwaith
Mae'r gwaith yn golygu teithio'n lleol i bob math o leoliadau y tu
mewn a'r tu allan yn cynnwys siopau, caffis, bwytai, warysau,
tafarndai, ffatrïoedd, cartrefi ac amryw o safleoedd eraill. Mae
swyddogion technegol yn monitro ac asesu llygredd sŵn ac aer yn
ogystal ag weithiau ymchwilio i dai budr neu bentyrrau o sbwriel
sy'n creu niwsans.
Gweithgareddau Dyddiol
Gyda'u hoffer monitro sŵn a dirgryniad neu nwy methan, mae
swyddogion technegol yn mynd i mewn i'r gymuned ac yn barnu a yw'r
cwynion a dderbyniant yn niwsans statudol. Maent yn siarad â'r bobl
sy'n cwyno ac yn cymryd mesuriadau - lefel y sŵn a lleoliad cŵn
sy'n cyfarth, naill ai'n eiddo preifat neu mewn cytiau cŵn, neu
effeithiau llygrol gwaith carthion nad yw'n gweithio'n iawn, er
enghraifft. Yna maent yn ysgrifennu adroddiadau a hanesion achos ac
yn ystyried a oes angen cyflwyno hysbysiad atal sŵn neu hysbysiad
cyfreithiol arall. Ond i ddechrau byddant yn ceisio cael y bobl
sy'n gyfrifol am y broblem i gytuno i gymryd camau cyn bo'n rhaid
gwneud hynny. Tri o'r prif feysydd pryder arbennig yw:
ymwybyddiaeth sŵn, ansawdd yr aer a thir halogedig.
Wrth ymchwilio i gwynion, mae'n rhaid i swyddogion technegol
ddefnyddio'u blaengaredd a gweithio mewn tîm ac ar eu pennau eu
hunain. Mae'n rhaid iddynt gysylltu â chydweithwyr sydd ag
arbenigeddau gwahanol a chydag adrannau eraill, gyda rheolwyr
cwmni, cynghorwyr lleol a'r cyhoedd. Ond nid yw'n negyddol i gyd.
Yn aml iawn caiff staff iechyd yr amgylchedd eu croesawu gan bobl
mewn pob math o lefydd oherwydd y gefnogaeth a'r diogelwch y
gallant eu cynnig.
Sgiliau a Diddordebau
Mae'n bwysig iawn meddu ar:
- allu ymarferol;
- rhoi sylw i fanylder;
- natur ofalgar;
- hyder;
- y gallu i ddod ymlaen â phobl o wahanol gefndiroedd;
- sgiliau cyfathrebu ysgrifenedig a llafar;
- tact;
- cadernid a bod yn ddiduedd;
- dealltwriaeth wyddonol a thechnegol.
A byddai'n ddefnyddiol i fod:
- â diddordeb mewn cefn gwlad;
- yn rheolwr prosiect medrus;
- yn gallu trin ffigyrau;
- yn drefnus wrth gasglu ffeithiau a gwybodaeth.
Gan fod delio â phobl a allai fod yn ymosodol ac afresymol yn
aml yn rhan fawr o'r swydd, dylai'r swyddog fod yn amyneddgar, yn
ddi-ffws ac â digon o dact. Yn aml gellir datrys problemau yn
anffurfiol drwy wrando'n dawel ar bob safbwynt ac felly osgoi
gorfod cyflwyno hysbysiadau cyfreithiol. Byddai o ddefnydd cael
profiad gwyddonol neu dechnegol blaenorol.
Gofynion Mynediad
Y gofynion mynediad arferol yw gradd mewn gwyddor amgylcheddol neu
wyddorau eraill. Disgwylir hyfforddiant yn y swydd tuag at
gymwysterau galwedigaethol (S/NVQs) a datblygiad proffesiynol
parhaus drwy gyrsiau neu fel aelod o gorff proffesiynol.
Rhagolygon a chyfleoedd i'r dyfodol
Gan fod pob Awdurdod Lleol yn cyflogi Swyddogion Llygredd
Technegol, mae cyfle i ehangu profiad a symud ymlaen i swyddi uwch
yn rhai Awdurdodau. Mae rhai Swyddogion wedi llwyddo i symud o fod
yn Swyddog Llygredd Technegol i gymhwyso fel Swyddog Iechyd yr
Amgylchedd.
Swyddi Cysylltiedig
Dilynwch y ddolen hon i weld rhestr o'r holl swyddi cysylltiedig
yn Gwarchod Eich Cymuned. Neu, dilynwch y ddolen hon i weld
yr holl ddisgrifiadau gyrfa yn yr un maes swydd .
Rhagor o Wybodaeth a Gwasanaethau
Gwybodaeth am yrfaoedd yn Iechyd yr Amgylchedd www.ehcareers.org
Y Gymdeithas Frenhinol er Hybu Iechyd www.rsph.org
Mae Gyrfa Cymru wedi cynhyrchu Sbotolau erthygl ar yrfaoedd mewn
STEM (gwyddoniaeth, technoleg, peirianneg a mathemateg): https://www.careerswales.com/cy/golwg-ar-stem/