Cyflwyniad
Mae swyddogion polisi a phrojectau'n cyflawni amryw ddyletswyddau
strategol. Bydd gan y rhan fwyaf ohonynt arbenigeddau fel
datblygu a gweithredu polisïau cynhwysiant a phartneriaethau
cymdeithasol. Yn ei hanfod, ystyr hyn yw gweithio i sicrhau
bod y cyngor yn cysylltu â'r cyhoedd a bod ei holl wasanaethau ar
gael iddynt mewn ffordd agored ac atebol. Mae'r swydd yn
bodoli mewn pob math o awdurdod.
Amgylchedd Gwaith
Bydd yn gweithio mewn swyddfa yn bennaf, a gall gynnwys mynychu
cyfarfodydd y cyngor. Efallai y bydd angen teithio'n lleol ac
yn y rhanbarth. Bydd defnydd sylweddol o gyfrifiadur.
Mae'r oriau contract yn amrywiol a gallant gynnwys rhywfaint o
waith gyda'r nos ac ar y penwythnos i alluogi cyfarfodydd gyda
phartneriaid mewnol ac allanol.
Gweithgareddau Dyddiol
Bydd angen delio â materion cymhleth a sensitif ar ran y Prif
Weithredwr a'r Dirprwy ar faterion polisi ar lefel uchel.
Gall hyn gynnwys sicrhau y delir â chwynion yn briodol - lle bo
ymrwymiadau o ran cydraddoldeb yn cael eu torri neu lle bo perygl
i'r gymuned, er enghraifft - sy'n cynnwys gweithio gyda
gwasanaethau cwsmeriaid, rheolwyr ansawdd a busnes a rheolwyr
eraill er mwyn cynnal egwyddorion democrataidd y cyngor.
Mae'r swyddog datblygu partneriaethau yn allweddol i'r berthynas
hon rhwng yr awdurdod a'r cyhoedd, a bydd yn gyfrifol am ddatblygu
partneriaethau â'r heddlu, darparwyr iechyd, grwpiau cymunedol,
asiantaethau gwasanaeth cymdeithasol ac ati. Mae hyn yn
cynnwys cysylltu ag adrannau eraill, asiantaethau allanol a grwpiau
cymunedol, gweithredu polisïau mewn rhaglenni ar gyfer dwyn
cymunedau ynghyd: eu helpu gyda thai, hawl am fudd-daliadau,
cyflogaeth, gofal, gwahaniaethu ac ati. Bydd cyswllt dyddiol
â'r sector gwirfoddol a gweithredwyr cymunedol. Bydd yn cynnwys
ymchwilio a llunio adroddiadau a dogfennau polisi, gwerthuso a
monitro cynlluniau mewn ymgynghoriad â swyddogion project polisi a
rheoli anghenion cyllido. Bydd angen cryn dipyn o siarad a
thrafod, ysgrifennu a meddwl fel rhan o'r swydd. Bydd angen
gwneud cyflwyniadau i grwpiau amrywiol yn y cyngor a thu hwnt yn
barhaus, a byddant wedi'u dylunio i roi gwybodaeth syml ac
arweiniad iddynt. Y nod cyffredinol yw sicrhau bod gwaith yr
awdurdod a'i bartneriaid yn trin pawb yn deg, waeth beth fo'u
dosbarth, statws neu grŵp ethnig - i leihau allgau cymdeithasol
drwy gydweithredu. Drwy hyn, bydd y swyddog datblygu
partneriaethau yn sicrhau bod y cyngor yn bodloni ei rwymedigaethau
statudol i gynnig arfer gorau yn seiliedig ar yr egwyddorion gorau.
Bydd swyddogion yn gweithio ar eu liwt eu hunain yn bennaf, ond
mewn cydweithrediad agos ag eraill ac o fewn terfynau amser, er nad
oes angen iddynt gwblhau dyletswyddau penodol bob diwrnod neu bob
wythnos. Mae'r gwaith hefyd yn cynnwys rheoli projectau
arbennig, er enghraifft:
- mentrau ansawdd a pherfformiad;
- partneriaethau cymdogaethol a strategaethau
adnewyddu;
- cymalau cymdeithasol wrth gaffael contractau;
- gwasanaethau i geiswyr lloches, gan gynnwys cymorth o ran
mynediad i gyfleusterau'r cyngor;
- trefniadau prynu, e.e. tai i bobl ag anghenion
arbennig;
- moderneiddio llywodraeth leol.
Sgiliau a Galluoedd
Bydd angen y canlynol arnoch:
- sgiliau dadansoddi;
- sgiliau cyfathrebu yn ysgrifenedig ac ar lafar;
- dealltwriaeth o eraill a pharch tuag atynt;
- dealltwriaeth o lywodraeth leol, anghenion lleol ac
ymwybyddiaeth wleidyddol;
- sgiliau cyflwyno;
- y gallu i reoli projectau;
- hyder;
- sgiliau rhifedd;
- sgiliau rhyngbersonol.
Gofynion Mynediad
Nid oes unrhyw ofynion penodol, ond bydd angen lefel dda o addysg,
yn ddelfrydol i lefel gradd neu gymhwyster cyfatebol. Mae
profiad o waith yn y maes hwn, sef gwaith a rheolaeth
gymdeithasol/cymunedol, yn arbennig mewn llywodraeth leol, yn
hanfodol. Byddai angen i ymgeisydd ddangos ymrwymiad i
ddatblygiad proffesiynol parhaus i sicrhau ei fod yn gwybod am
newidiadau a datblygiadau i bolisi cenedlaethol a pholisi'r Undeb
Ewropeaidd, ond nid oes cymhwyster galwedigaethol.
Cyfleoedd yn y Dyfodol
Nid oes llawer o gyfleoedd am ddyrchafiad, ond gellir
trosglwyddo'r sgiliau sydd eu hangen i wneud y swydd i lawer o
rolau uwch reoli eraill. Y cam naturiol nesaf fydd i rôl prif
reolwr gwasanaethau yn un o'r cyfarwyddiaethau. Gall hyn
olygu y bydd angen i chi symud i gyngor neu adran wahanol, ond bydd
yn bosibl cael swydd fel prif weithredwr cynorthwyol, a cheir
swyddi ar lefel uchel mewn unedau polisi canolog. Gall fod
llawer o gyfleoedd y tu allan i awdurdodau lleol gyda'r llywodraeth
ganolog, neu mewn swyddi rheoli strategol yn y sector preifat.
Rhagor o Wybodaeth a Gwasanaethau
Cymdeithas Llywodraeth Leol www.lga.gov.uk
Cymdeithas Llywodraeth Leol Cymru www.wlga.gov.uk
Gallwch gael rhagor o wybodaeth am y maes gwaith hwn drwy Yrfa
Cymru (www.gyrfacymru.com)
neu yn eich llyfrgell leol, swyddfa gyrfaoedd neu lyfrgell
gyrfaoedd eich ysgol.