Cyflwyniad
Mae pensaernïaeth dirlunio mewn llywodraeth leol yn ymwneud â lle
a gofod. Gallai pensaer tirlunio fod yn dylunio nifer o
ardaloedd awyr agored, o barciau dinesig neu broject adnewyddu
trefol i ardal chwarae mewn coetir neu ardd hanesyddol.
Cyflogir penseiri tirlunio llywodraeth leol yn y rhan fwyaf o
gynghorau mawr, fel arfer yn yr adran parciau, hamdden neu
wasanaethau diwylliannol.
Amgylchedd Gwaith
Fel arfer mae Penseiri Tirlunio yn gweithio mewn swyddfeydd, ond
fel arfer maent yn gwneud llawer o waith yn yr awyr agored
hefyd. Fel arfer, yr oriau gwaith yw 37 awr yr wythnos.
Gweithgareddau Dyddiol
Mae Penseiri Tirlunio llywodraeth leol yn cynllunio, dylunio a
rheoli ardaloedd awyr agored sy'n addas at y diben yn ddeniadol ac
yn gynaliadwy. Maent yn adfywio ac yn datblygu hen dirluniau
ac yn dylunio a chreu rhai newydd.
Gall y dyletswyddau gynnwys rhywfaint o'r canlynol, os nad pob
un ohonynt:
- cytuno ar frîff dylunio gyda chleientiaid;
- paratoi darluniadau, brasluniau ac amcanbrisiau;
- datblygu cynigion dylunio manwl a chynlluniau iechyd a
diogelwch;
- paratoi tendrau a dogfennaeth contract;
- ysgrifennu adroddiadau technegol;
- ymweld â safleoedd i gynnal arolygon neu oruchwylio gwaith sy'n
mynd rhagddo;
- cadw cofnodion cywir o ddyluniadau, costau ac ymweliadau
monitro;
- cynnig cyngor tirlunio i gydweithwyr yn y cyngor, er
enghraifft, i swyddogion cynllunio ar effaith ceisiadau cynllunio
ac ailddatblygiadau;
- gweithio mewn partneriaeth â gweithwyr proffesiynol eraill yn
ystod y broses ddylunio a gweithredu, er enghraifft, peirianwyr,
penseiri a chynllunwyr;
- delio ag ymholiadau ac ymgynghori â'r cyhoedd ar brojectau
tirlunio.
Bydd gwaith pensaer tirlunio llywodraeth leol yn dibynnu ar ei
leoliad. Mewn ardaloedd gwledig gall y pwyslais fod ar
amaethyddiaeth, coedwigoedd a thwristiaeth, tra bod y gwaith yn aml
yn ymwneud ag adfywio tai cyhoeddus, gwaith ffordd, parciau ac
ardaloedd hamdden eraill mewn ardaloedd trefol.
Sgiliau a Galluoedd
Mae angen y canlynol ar benseiri tirlunio llywodraeth leol:
- sgiliau dylunio graffeg a TG;
- sgiliau cyfathrebu;
- manwl gywirdeb;
- creadigrwydd a sgiliau datrys problemau arloesol;
- sgiliau ysgrifennu adroddiadau;
- sgiliau rheoli project.
Gofynion Mynediad
I fod yn gwbl gymwys bydd angen i chi fod yn aelod llawn o
Sefydliad Tirlunio. Dylech ddechrau drwy gwblhau gradd sydd
wedi'i hachredu gan y Sefydliad Tirlunio. Fel arfer bydd
angen o leiaf 2 Lefel A neu gymwysterau cyfatebol i gael mynediad i
radd israddedig. Mae cyrsiau ôl-raddedig ar gael i'r rheini
nad oes ganddynt radd dosbarth cyntaf. Mae rhestr o gyrsiau
prifysgol achrededig ar gael ar wefan y Sefydliad Tirlunio.
Unwaith i chi gwblhau eich gradd yn llwyddiannus, byddwch yn cael
eich gwneud yn un o Aelodau Cyswllt y Sefydliad Tirlunio. Os
oes gennych brofiad gwaith perthnasol yn lle gradd achrededig,
gallech gael eich gwneud yn Aelod Cyswllt o hyd.
Er mwyn gweithio tuag at aelodaeth lawn o'r Sefydliad Tirlunio,
rhaid i chi gwblhau'r Llwybr Siartredig. Mae hyn yn ymwneud â
datblygu gwybodaeth a phrofiad drwy arfer proffesiynol. Mae
unigolion yn dilyn y llwybr ar eu liwt eu hunain, ond mae angen tua
dwy flynedd ar y rhan fwyaf o bobl i fod yn barod ar gyfer yr
arholiad llafar terfynol. Drwy gwblhau hwn yn llwyddiannus, cewch
aelodaeth gyflawn o'r Sefydliad Tirlunio. Unwaith i chi gael
aelodaeth gyflawn, cewch ddefnyddio'r teitl Pensaer Tirlunio
Siartredig. Fodd bynnag, mae angen dilyn datblygiad
proffesiynol parhaus drwy gydol eich gyrfa i sicrhau bod eich
sgiliau yn gyfredol.
Cyfleoedd ar gyfer y Dyfodol
Ceir datblygiad proffesiynol clir o fod yn Aelod Cyswllt i fod yn
Aelod Llawn o'r Sefydliad Tirlunio. Gall y rheini â llawer o
brofiad symud i rolau fel uwch/prif bensaer tirlunio. Gallai
fod cyfleoedd hefyd i symud i swydd reoli, naill ai yn yr adran
dylunio tirlunio neu'n ehangach yn adrannau eraill y cyngor lleol,
fel pensaernïaeth, rheoli adeiladu a chynllunio.
Rhagor o Wybodaeth a Gwasanaethau
Ysgol Gyswllt Pensaernïaeth www.landscapeurbanism.aaschool.ac.uk
Cymdeithas Diwydiannau Tirlunio Prydain www.bali.org.uk
Y Sefydliad Tirlunio www.landscapeinstitute.co.uk
Lantra www.lantra.co.uk
Cymdeithas y Tirlunwyr Proffesiynol www.landscaper.org.uk
Mae Gyrfa Cymru wedi cynhyrchu erthygl Sbotolau ar yrfaoedd ym
maes adeiladu: https://www.careerswales.com/cy/golwg-ar-adeiladu/
Gallwch gael rhagor o wybodaeth am y maes gwaith hwn drwy Yrfa
Cymru (www.gyrfacymru.com)
neu yn eich llyfrgell leol, swyddfa gyrfaoedd neu lyfrgell
gyrfaoedd eich ysgol.